Editorial – PLATTart

Editorial

ANNIE HEGER

Künstlerische Leitung

Wi Minschen bruukt mehr #mitnanner …

… nich eerst siet de globaal Pandemie, de us nich tosamen hett kamen laten. Männigmaal hebb ik dat Geföhl, dat gifft mehr Themen up Welt, de us as Sellskupp utnanner fallen laten as de, de us verbinnen. Dat fangt in Lüttjen an un höört bi de groten Weltthemen nich up. Man ok wenn de egen Menen, Egensücht und Gloov sük twüschen de Minschen stellt, wi köönt al wat finnen, dat us eent. So lüttjet as dat ok ween kann, dat lohnt sik dorna to söken.

För mehr #mitnanner köönt wi …

… elke Dag en nejen Entscheden drapen. Wi mööt us besinnen, us Tegenöver tolustern, weten an welcke Stee wi privilegeert sünd un wor wi us Glück, Riekdoom, Platz un Freedoom mit anner Minschen delen köönt.

De Bidrag van Spraak för mehr #mitnanner is, dat …

wi Minschen en Rucksack an Geschichten mit us dragen. Un wenn wi de Annern verstahn willt un weten willt, wat se bruukt un ok wat se to geven hebbt, denn kaamt wi um Spraak nich umto. Us Festival vertellt en Bült Geschichten, de so spannend, anröhrend un wichtig sünd, dat dat #mitnanner sük dör al de 10 Dagen treckt, so as de luttjen „Spraakbubbels“ dör us Programmheft.